Һаулыҡты нығытабыҙ

Өфөлә, милли батырбыҙ Салауат Юлаев һәйкәле ҡаршыһында, Эльбрус Ниғмәтуллин менән берлектә скандинав атлауы буйынса клуб асылды.
Сара ҡунаҡтары көслө кешеләрҙең “ПАЗ” автобусын һөйрәтеүенә шаһит булды. Пауэрлифтинг һәм армреслинг буйынса спорт мастеры, “Рәсәйҙең иң көслө кешеһе” конкурсында дүрт тапҡыр еңеп сыҡҡан Эльбрус Ниғмәтуллин скандинав атлауының файҙаһы хаҡында һөйләне.
Әйткәндәй, был проекттың маҡсаты – халыҡты сәләмәт тормош алып барыуға, һаулыҡты нығытыуға, физик культура – скандинав атлауы – менән даими шөғөлләнеүгә ылыҡтырыу. Тағы оло йәштәгеләрҙе һәм Өфө, Сибай, Нефтекама, Учалы, Стәрлетамаҡ ҡалаларында йәшәгән урта йәштәгеләрҙе физик культура менән шөғөлләнеүгә йәлеп итеү.
Тамашасылар алдында “Зәйнетдин” этно-шоу проекты һәм Нариман Сабитов исемендәге 1-се балалар музыка мәктәбе педагогы Динә Күсәева сығыш яһаны.