“Парлы типһен йөрәктәр!”

50 йыл – ул күпме? Ярты быуат, тиһәң – күп, 50 йыл, тиһәң аҙ һымаҡ. Ярты быуат эсендә ауылдар ҡалаға әйләнә, баш етмәҫлек әллә күпме яңы технологиялар уйлап табыла, тотош илдәрҙең тарихы үҙгәреп өлгөрә... Шул ярты быуат эсендә бәләкәй генә ауылда бар районды таң ҡалдырырлыҡ яңы династия барлыҡҡа килә. Һүҙем – Сәләх ауылынан Ҡорманғәле һәм Ғәлиә Таһировтар тураһында. Ҡорманғәле Әбделғәләм улы ла, Ғәлиә Кинйәғәле ҡыҙы ла – районыбыҙҙа ихтирам һәм хөрмәт ҡаҙанған кешеләр. Ғаилә башлығы ғүмерен совхоз эшенә бағышлаһа, хужабикә хаҡлы ялға киткәненсә ауыл клубын етәкләне. Тап улар, пар ҡанаттар булып, быйыл алтын туйҙарын билдәләйҙәр. Ошондай матур дата айҡанлы Таһировтар халыҡҡа ла байрам бүләк иттеләр: район мәҙәниәт һәм ял үҙәгендә “Парлы типһен йөрәктәр!” тип исемләнгән театрлаштырылған концерт ҡуйҙылар.