Гәзитебеҙҙең тоғро дуҫтары

– Үҙ районымды, үҙ ауылымды ғына түгел, үҙ районкамды ла яратам. Тормош иптәшем Иҙрисем дә: “Үҙ районыңда йәшәп тә район гәзитенә яҙылмау – оят, хурлыҡ ул”, тип әйтә торғайны. 53 йыл Ҡаҙырша ауылында йәшәйем, Аллаға шөкөр, районканы шул 53 йыл дауамында бер өҙмәй алдырам. Һеҙ ҙә яҙылығыҙ, алдырығыҙ! Бүләк өсөн түгел, ә үҙ районыңдың хәлен белеү өсөн кәрәк ул гәзит. Ә шулай ҙа, бүләгегеҙ өсөн рәхмәт! – ти Сәлихә Мирғәле ҡыҙы.

Сәлихә Мирғәле ҡыҙы ҡартатай һәм өләсәй тәрбиәһендә үҫә. Уларға эйәреп, динде һөйөп, яратып буй еткерә ҡыҙ. Уны: “Кеше йомошҡа килһә, бер ваҡытта ла ҡоро сығармаҫҡа, урламаҫҡа, алдашмаҫҡа! Кеше ҡайғырһа – ҡуша ҡайғыр, ҡайғыһын уртаҡлаш, тол ҡалған, яңы бушанған ҡатындың хәлен бел. Хәл белергә форсатың булмаһа, мөрйәһенең төтөнөн ҡараһаң да сауап була”, – тип өйрәтеп үҫтерәләр.