+24 °С
Ямғыр
Барыһы ла Еңеү өсөн
28 Июль , 06:10
Йөрәк йылыһын, изге теләктәрен ҡушып
Фронт тураһында һүҙ сыҡҡанда беҙ иң тәүҙә тәрән окоптарҙы, самолет-танктарҙы, ҡулына ҡорал тотоп илебеҙ һағына баҫҡан батыр яугирҙәребеҙҙе күҙ алдына килтерәбеҙ. Ә бит тылда ла үҙенә күрә “яу яланы”, бында ла көтөп алынған Еңеүҙе яҡынайтыу өсөн әллә күпме изге эштәр башҡарыла. Район ветерандар Советы урынлашҡан бинаға килеп инеү менән танауға тәмле-тәмле еҫтәр килеп бәрелә. Күрше бүлмәлә генә, “Преображенск” халыҡты социаль хеҙмәтләндереү үҙәгендә бына инде бер нисә йыл дауамында һалдаттар өсөн ҡорот, төрлө йәшелсә аштары, хатта былау киптерелә. Ошонда уҡ яугирҙәргә кәрәкле кейем-һалым тегелә, гуманитар ылау менән оҙатыу өсөн ҡап-ҡап әйберҙәр йыйыла. Ә бинаға ингән ерҙәге дөйөм коридорҙа көн дә маскировка селтәрҙәре үрәләр. Был мөһим эште башлыса өлкән быуын вәкилдәре атҡара.
Йөрәк йылыһын, изге теләктәрен ҡушып
Район ветерандар Советы рәйесе Надежда Ивановна Булавина етәкселегендә оло ағай-апайҙар бында эшкә йөрөгән кеүек килә. Улар өсөн ял көндәре лә, насар һауа торошо ла юҡ. Сөнки ҡайҙалыр меңәр саҡрым алыҫлыҡта кемдеңдер ғәзиз улы йәки атаһы мәкерле дрон һөжүмен кире ҡаға, һуңғы көскә яралы иптәшен яу ҡырынан сығара. Ә бит уларға ла беҙҙең ярҙамыбыҙ, ышаныслы тылыбыҙ кәрәк. Изге доғаларын эстән ҡабатлай-ҡабатлай, күктәрҙән тиҙерәк тыныслыҡ килеүен һорай-һорай үрелгән һәр селтәр әллә нисәмә яугирҙең ғүмерен ҡотҡарырға, әллә күпме хәрби техниканы һаҡлап алып ҡалырға һәләтле. Был хаҡта ҡыҫҡа ваҡытлы ялға ҡайтҡан яҡташтарыбыҙ үҙҙәре һөйләй.
- Миңә бер кемде лә өгөтләргә кәрәкмәй. Бында күңел талабы буйынса киләләр, – ти изге башланғыстың инешендә тороусы Надежда Ивановна Булавина. – Селтәр үреү, әлбиттә, бик еңел хеҙмәт түгел. Оло кешеләрҙең һаулыҡ торошо ла, билдәле, төрләнеп китә. Шулай ҙа бер ҙә бирешмәйбеҙ, бер беребеҙ менән аралашып, һуңғы яңылыҡтар менән бүлешеп, дәррәү генә эшләп тә ҡуябыҙ. Үҙеңде ошо оло миссияның бер өлөшө итеп тойоу, нисә йәштә булыуыңа ҡарамаҫтан Тыуған илеңә файҙа килтерә алыуың йәшәүгә көс-дәрт бирә бит ул.
