Бөтә яңылыҡтар
Конкурстар
19 Ноябрь 2019, 13:42

Иң яҡшы яңы йыл ҡаласығын кемдәр эшләр?

Барыбыҙ ҙа көтөп алған мөғжизәле Яңы йыл байрамы етеүгә айҙан ашыу ваҡыт ҡына ҡалып бара. Республика хөкүмәтенең матбуғат хеҙмәтенән хәбәр итеүҙәренсә, Башҡортостанда “Иң яҡшы яңы йыл ҡаласығы” конкурсы иғлан ителә.

10 декабрҙә старт аласаҡ ярыш ҡала округтары һәм ауыл биләмәләре араһында ойошторола. Призлы урындарҙы билдәләгәндә комиссия байрам ҡаласыҡтарының биҙәлешен, яҡтылыҡ элементтарын, иллюминацияларҙы, байрамдың төп атрибуты – яңы йыл шыршыһының ҡупшылығын, скульптура композицияларын, боҙ һындарҙы, ҡар тауҙарын баһалаясаҡ.
Иң яҡшы яңы йыл ҡаласыҡтары булдырған муниципаль берәмектәрҙең хакимиәттәренә аҡсалата премия ҡаралған: беренсе урынға – 500 мең һум, икенсе урынға – 200 мең һум, өсөнсө урынға – 150 мең һум. Бүләк фонды муниципаль берәмекте төҙөкләндереүгә йүнәлтелә.
Конкурс һөҙөмтәләре 2020 йылдың 19 ғинуарына тиклем билдәле буласаҡ.