Йәштәр халыҡ кәсептәрен теләп өйрәнә

2022 йылды Бөтә донъя башҡорттары ҡоролтайы Башҡорт мәҙәниәте һәм рухи мираҫ йылы тип иғлан итте, ил Президенты Владимир Путин Рәсәй халыҡтарының мәҙәни мираҫы йылын үткәреү тураһындағы Указға ҡул ҡуйҙы. Шул ваҡыттағы башланғыстар әле булһа дауам итә. Мәҙәни мираҫты тергеҙеү һәм үҫтереү йәштәр араһында ла популярлаша бара. Милли традицияларыбыҙға, йолаларыбыҙға, ғөрөф-ғәҙәттәребеҙгә лә иғтибар бермә-бер арта бара.
Бына яңыраҡ беҙҙең район ерлегендә уҙған "Аҫылташ-2024" форумында йәштәрҙе урындағы халыҡтың ҡул эштәре, кәсептәре менән таныштырыу маҡсатында бай күргәҙмәләр әҙерләнде, оҫталыҡ дәрестәре ойошторолдо.

Этно майҙансыҡтарҙа йәштәр  ысын һарыҡ йөнөнән кейеҙ һуғыу, төҫлө ептәрҙән турпыша туҡыу оҫталығына өйрәнә алды. Ҡыҙҙар ынйыларҙан заманса стилләштерелгән муйынсаҡ, беләҙек үрҙе, башҡорт милли кейемен кейеп ҡараны. Ошонда уҡ милли эсемлегебеҙ ҡымыҙҙан, милли аҙығыбыҙ талҡандан, балдан ауыҙ итергә була ине. Татлы сәк-сәкте барыһы ла тәмләп ҡараны, теләгәндәр бешереп тә ашаны. Хуш еҫ бөркөп торған үлән сәйе эҫе көндә барыһына ла хуш килде. Йәштәр файҙалы үләндәр менән дә ҡыҙыҡһынды. Йөрьәт иткәндәр үҙҙәрен ысын уҡсы ролендә һынап ҡарай алды. Бөтәһенә лә айырыуса башҡорттарҙың  милли түңәрәк уйындары оҡшаны, улар рәхәтләнеп уйнаны, бейене.

Был күргәҙмәләрҙе Башҡортостан Республикаһы Башлығы хакимиәте етәксеһенең эске сәйәсәт буйынса беренсе урынбаҫары Азат Бадранов та ҡарап сыҡты.  

– Мәҙәниәт һәм рухи мираҫ – мәңгелек ҡиммәттәр. Уны оноторға хаҡыбыҙ юҡ. Киреһенсә, мәҙәни мираҫты, милли кәсептәрҙе тергеҙеү һәм үҫтереү өҫтөндә эшләргә кәрәк. Айырыуса йәштәр араһында быға иғтибар ҙур булыуы ҡыуандыра, – тине Азат Шамил улы.
Хәтерегеҙгә төшөрәбеҙ, "Аҫылташ" форумының  төп маҡсаттарының береһе  – башҡорт мәҙәниәтен һаҡлау һәм популярлаштырыу.