Бәләкәс принцессалар һәм рыцарҙар балы үтте

Йылайыр ауылындағы балалар ижад мәктәбендә уҙған сарала бәләкәй ҡыҙҙар һәм малайҙар ҡатнашты. Улар барыһы ла байрамса кейенеп, шәп кәйеф менән килде балға. Мәктәп тышында уҡ бәләкәй ҡунаҡтарҙы “Маша и медведь” йәнһүрәте геройы – айыу ҡаршы алды. Балалар уның менән ҡосаҡлашып сәләмләшкәс, иҫтәлеккә фотоға төшөп кинәнде. Ә мәктәп ишеген асып ингәс, принцесса һәм рыцарҙарҙы биҙәлгән короналар тотоп ҡаршы алған апайҙар залға әйҙүкләне.

Иҫтә ҡалырлыҡ, йәмле сараға килгән балаларҙы һәм уларҙың ата-әсәләрен район хакимиәте башлығы Борис Николаевич Мелкоедов йылы сәләмләне. Уңыштар, һаулыҡ һәм бөтмәҫ энергия теләне.

- Бөтә хыялдарығыҙ ҙа тормошҡа ашыуын теләйем, әлбиттә. Ата-әсәйҙәрегеҙҙең йылыһын, һөйөүен тойоп йәшәгеҙ, – тип тамамланы телмәрен башлыҡ.

Бәләкәй принцессалар һәм рыцарҙар балын биҙәп, Балалар ижад йорто тәрбиәләнеүселәре йырланы, бейене. Аҙаҡ күңелле уйындар уҙғарылды. Балалар рәхәтләнеп үҙ-ара ярышып, туп ташлап, үҙҙәрен мәргәнлеккә һынап ҡарап ҡыуанды. Сара һуңында бөтә балаларға ла иҫтәлекле бүләктәр тапшырылды.

Балаларына үҙ-ара аралашыу мөмкинлеге бүләк иткәндәре өсөн “Бәләкәй принцессалар һәм бәләкәй рыцарҙар турниры”нда ҡатнашҡан ата-әсәләр сараны ойоштороусыларға ҙур рәхмәтле булды.