Ҡан тамырҙарының киңәйеп, селтәрләнеп тороуы менән күпселек ҡатын-ҡыҙ осраша

Һыҙланыу, шешенеү һ.б. тайпылыштар барлыҡҡа килеү менән бергә, тышҡы ҡиәфәтте лә ныҡ ҡына боҙа был күренеш. 

Ҡан тамырҙары киңәймәһен өсөн уның тонусын күтәрергә кәрәк, ти табиптар. Диңгеҙ тоҙо менән дауаланыуҙың яҡшы һөҙөмтәгә килтереүе асыҡланған. Дауаланыуҙы маҡсат итеп ҡуйғанда дарыухананан йә махсус магазиндан уның бер ниндәй ҡушылмаһыҙын алырға кәрәк.

Диңгеҙ тоҙон әҙ генә һыу менән ҡатыштырып, иҙәбеҙ. Бутҡа хәлендәге шыйыҡсаны һыуытҡыста 0 градусҡаса һыуытырға кәрәк була. Бер нисә ҡат марляға йә ситса туҡымаға ошо иҙелмәне һалып, сирле урынға ябырға һәм, өҫтөнән нығытып бәйләп, бер аҙға ҡалдырырға кәрәк. Диңгеҙ тоҙо ҡан әйләнешен яҡшыртыуға булышлыҡ итә. Ә уны һыуытып алыу ҡан тамырҙарын нығытыу һәм ауыртыуҙы баҫыу өсөн кәрәк. Шуның өсөн йылынғанын һиҙеү менән бәйләмде алырға тырышығыҙ. Аҙаҡ урынын һалҡын һыуҙа сылатылған таҫтамал менән ышҡып, еңелсә массаж эшләү ыңғай һөҙөмтәле булыр.

Был процедураны аҙна буйы көнөнә ике тапҡыр эшләгәндә лә еңеллек һәм файҙаһы һиҙелер. Күренеүенсә, дауаланыу ваҡытты ла күп алмай, ҡыйынлығы ла юҡ. Тик шуныһы бар: ул флебит менән ҡатмарлашһа, йә сир аҙған булһа, үҙаллы дауаланыу менән мауыҡмаҫҡа, иң яҡшыһы - табипҡа мөрәжәғәт итергә кәрәк.