Яңы уңышҡа ҡыуанып

Быйыл хужалыҡтың  сәсеүлек майҙандары ике мең гектарҙан  ашыу ерҙе биләй. Уларҙың һигеҙ йөҙөнә ҡаты сортлы бойҙай, өс йөҙөнә йомшаҡ сортлы бойҙай, ә йөҙ гектарына һоло һәм арпа, тағы ла һигеҙ йөҙөнә етен сәселгән.

Һуңғы йылдарҙа районыбыҙҙың бар фермерҙары ла етен үҫтереүгә дәррәү тотондо. Беҙҙең шарттарҙа ул тотороҡло рәүештә яҡшы уңыш бирә, ә иң мөһиме – баҙарҙа ҙур һорау менән файҙалана. Сөнки бөгөнгө көндә уңышты үҫтереп йыйып алыу ғына түгел, уны мөмкин тиклем күберәк файҙа менән һатырға ла кәрәк.

Ғәзиз Морат улы һөйләүенсә уның баҫыуҙарында үҫтерелгән һолоно, аҙыҡҡа яраҡлы булғанға күрә, күптәребеҙ яратып ашаған һоло печеньеһын етештереүселәр  теләп һатып ала икән.

Комбайндар һәм автомобилдәр хужалыҡта яңы. Уларҙа яуаплы һәм тәжрибәле водителдәр эшләй. Бер-береһе менән ярты һүҙҙән аңлашып эшләгәнгә күрә эш процессы яйға һалынған һәм һөҙөмтәле бара.

• Бына ошо «Полесье» комбайнын 2023 йылда Ауыл хужалығы министрлығы линияһы буйынса биш йылға льготалы кредитҡа алдым. Ул осорҙа бер комбайдың хаҡы 15 миллион һум ине. Кредитты әлегә уңышлы түләйем, ә техника үҙ бурыстарын үтәп килә. Республикабыҙҙың Ауыл хужалығы министрлығы фермерҙарға ярҙам итеү буйынса, шул иҫәптән техника һәм ҡорамалдар һатып алыу буйынса күп программаларҙы тормошҡа ашыра. Һәм әлбиттә күп кенә аграрийҙар был ярҙам менән файҙалана һәм хужалыҡтарының матди базаһын нығыта, – ти хужалыҡ башлығы.

Хужылыҡта иген йыйыу тамамланған тиерлек, сиратта етен баҫыуы. Ә һуңынан киләһе йыл уңышына нигеҙ һалыу хаҡында ла хәстәрлек күреләсәк.  Бының өсөн ерҙе эшкәртеү – бер өлөшөн тулы күләмдә һөрөү, бер өлөшөн тырматыу эштәре башҡарыласаҡ.