Атайҙар - донъя тотҡаһы

Хәҙерге көндә атайҙың төп бурысы ғаиләне матди яҡтан тәьмин итеүгә ҡайтып ҡала. Эштән бушамаған ир-егеттәрҙе ниндәйҙер байрамдарға түгел, хатта мәктәптә үткән ата-әсәләр йыйылыштарына йәлеп итеүе ҡыйын. Рәсәй Призеденты Владимир Путин указына ярашлы илебеҙҙә Атайҙар көнө булдырылыуы һәм уның ял көнөнә тура килеүе юҡҡа тугел. Был көндө ир-ат тап ғаиләһе, балалары менән үткәреү мөмкинлегенә эйә.

Атайлы бала – арҡалы, ти халыҡ мәҡәле. Атаһынан яратылған ҡыҙҙар иркәле, ә атайлы малайҙар көслө рухлы булып үҫә. Атай кеше ғаиләһенең именлеген һаҡлаусы, донъя тотҡаһы. Шул уңайҙан Йылайыр ауылындағы «Йондоҙло» физкультура-һауыҡтырыу комплексында Ғаилә үҙәге, Берҙәм Рәсәй фирҡәһе хеҙмәткәрҙәре менән берлектә  Атайҙар көнөнә арналған спорт байрамы үткәрҙе. Ул-ҡыҙҙарын етәкләгән, ҡайһылары хатта бөтә ғаиләһе менән килгән атайҙарҙы район хәкимиәте башлығының социаль мәсьәләләр буйынса урынбаҫары Илшат Рәшит улы Солтәнгәрәев сәләмләне һәм ярышта ҡатнашыусыларға сәм, дәрт, уңыштар теләне.

 Спорт ярыштарында барлығы туғыҙ атай һәм балалар көс һынашты. Улар үҙҙәрен дартс, боулинг, оҙонлоҡҡа һикереү кеүек һәм башҡа спорт төрҙәрендә  һанап ҡараны.  Ярыш сәмле барҙы. Бар донъя мәшәҡәттәрен онотоп ысын күңелдән ярышҡан  атайҙарға, улар артынан ҡалышмаған балаларға ҡарауы үҙе бер күңелле тамаша ине. Эш, донъя  мәшәҡәттәренән арынып, спорт ярыштарында ҡатнашыу  матур сараға килгән ғаиләләр өсөн яҡшы, файҙалы ял булды. 

Ярыш булғас еңеүсеһе лә була тигәндәй,  бар һынауҙарҙы ла етеҙ, уңышлы башҡарып Юлдыбай ауылынан аталы-ҡыҙлы Алһыу һәм Венер Ҡоҙашевтар беренсе урынға лайыҡ булды. Икенсе урынға Йылайыр ауылынан Әмир һәм Ильмир Ҡужагилдиндар дәғүә итһә,  Динис һәм Илмир Ильясовтар өсөнсө урын менән хушһынды. Номинациялар буйынса Искәндәр һәм Иштуған Мостафиндар «Иң татыу», Ильяс һәм Арсен Әптековтар «Еңеүгә ынтылыш», Сабрина һәм Алишер Әминовтар «Иң дәртле»,  Айназ һәм Илфат Такаловтар «Иң актив», Илһам һәм Илшат Солтангәрәевтар «Иң етеҙҙәре», Айназ һәм Илгиз Иғдәүләтовтар «Иң мәргәндәре» тип табылды. Сарала әүҙем ҡатнашҡан һәр кем  иҫтәлекле бүләктәр менән бүләкләнде һәм күтәренке кәйеф менән таралышты