Алдан хәбәр итеүебеҙсә, ошо көндәрҙә Матрай төп дөйөм белем биреү мәктәбе үҙенең бер быуатлыҡ оло юбилейын билдәләне.  Бай тарихлы белем усағы тупһаһы аша бер быуат дауамында  меңәрләгән ҡыҙ һәм малай атлап үтеп, белем серҙәренә төшөнгән, ҡанат нығытып, ошонан ҙур тормошҡа юл алған. Хәҙерге көндә Матрай мәктәбенең сығарылыш уҡыусылары илебеҙҙең әллә күпме тарафтарында йәшәй, урта махсус һәм юғары белемгә эйә булып, төрлө тармаҡтарҙа хеҙмәт итә.

Белем усағының бер быуатлыҡ юбилейы уңайынан ойошторолған был сараға Матрайҙар  тейешле юғары кимәлдә әҙерләнгәйне. Мәктәп бинаһының тыш һәм эс яҡтан, шулай уҡ ҡоймаларҙың буяуҙары яңыртылды, тематик банерҙар, шарҙар эленде, мәктәп коридорҙарында уның тарихын, ҡаҙаныштарын һүрәтләгән стендтар, эстәлекле күргәҙмәләр, мөйөштәр һәм фотокүргәҙмәләр ойошторолдо.

Матур байрам сараһы үтәсәк был иртәлә мәктәп ихатаһында бығаса булмаған йәнлелек хөкөм һөрҙө:  ҡасандыр ошо мәктәптә уҡытҡан педагогик хеҙмәт ветерандары, уҡытыусылар, тәрбиәселәр, төрлө йылдарҙағы сығарылыш уҡыусылары һәм  мәртәбәле ҡунаҡтар килде, нисәмә йылдар дауамында күрешмәгән һабаҡташтар  күрешеп, һөйләшеп һүҙҙәре бөтмәне, ҡасандыр үҙҙәренә белем биргән уҡытыусылары менән осрашып, хәтирәләр яңыртты, белем усағы буйлап ойошторолған экскурсияла йөрөнө.

Байрам сараһы Бөйөк Ватан һуғышында һәләк булған геройҙар обелискына сәскәләр һалыу менән башланып китте. Артабан сарала ҡатнашыусылар ауыл хужалығы эшмәкәре, ике тапҡыр Хеҙмәт Ҡыҙыл Байраҡ, Октябрь Революцияһы ордендары кавалеры, Түңгәүер ырыуының данлыҡлы шәхесе  Әнүәр Ярмулла улы  Ҡаҙаҡбаев иҫтәлегенә бюст асыу тантанаһына йыйылды. Унда район хакимиәте башлығы Борис Николаевич Мелкоедов, Әнүәр Ярмулла улының балалары, килгән ҡунаҡтар һәм ауыл халҡы ҡатнашты. Сараны асып  алып барыусы башҡорт теле һәм әҙәбиәте уҡытыусыһы Әлфиә Ҡаҙаҡбаева Әнүәр Ярмулла улының тормош юлына байҡау яһағандан һуң һүҙ район хакимиәте башлығы Борис Николаевич Мелкоедовҡа бирелде.

• Бөгөн районыбыҙҙың күп һанлы халҡы, уның ауылдаштары һәм көрәштәштәре Әнүәр Ярмулла улының иҫтәлеген хөрмәтләргә йыйылды. Беҙ уның йөрәктәрҙә сағыу эҙ ҡалдырған хеҙмәтен, эшенә тоғролоғон һәм тыуған еренә һөйөүен рәхмәт менән иҫкә алабыҙ. Аталары иҫтәлегенә бюст ҡуйырға ҡарар иткән балаларына рәхмәтемде еткерәм, – тине Борис Николаевич үҙ сығышында.

Әнүәр Ҡаҙаҡбаевтың улы Илдар Ҡаҙаҡбаев менән ҡыҙы Айгөл Атанова ла йыйылыусылар алдында  һүҙ тотоп аталары тураһында яҡты иҫтәлектәре менән бүлеште һәм бюст асыуҙа булышлыҡ иткән һәр кемгә оло рәхмәттәрен еткерҙе.

– Бөгөнгө тантана атайыбыҙҙы хөрмәт итеү,  исемен мәңгеләштереү, уның ҡаҙаныштары менән киләсәк быуынды таныштырыу йәһәтенән башҡарылған ҙур эш булып тора, – тип билдәләне Айгөл Әнүәр ҡыҙы Атанова.

Заманында Әнүәр Ҡаҙаҡбаев менән бергә эшләгән коллегалары Фәтих Аллабирҙин менән Басир Мәҡсүтов та Әнүәр Ярмулла улының “Башҡорт” совхозын үҫтереүҙә күп көс һалған  талантлы шәхес, талапсан етәксе һәм яҡшы кеше булыуы хаҡында һөйләп үтте.  Бюсты тантаналы асыу хоҡуғы район хакимиәте башлығы Борис Мелкоедов менән Әнүәр Ҡаҙаҡбаевтың улы Илдар Ҡаҙаҡбаевҡа бирелде. Аҡ япма алынып бюст асылғандан һуң  тантанала ҡатнашыусылар яңы һәйкәл янына сәскәләр һалды һәм иҫтәлеккә фотоға төштө.

Сараның рәсми өлөшө –  белем усағының 100 йыллыҡ юбилей сараһына бағышланған тантаналы линейка мәктәп алдында урынлашҡан майҙансыҡта үтте.  Рәсәй һәм Башҡортостан Гимндары аҫтында район хакимиәте башлығы Борис Мелкоедов менән Матрай мәктәбен тамамлаусы иң оло уҡыусы Әминә Лоҡманова тарафынан Дәүләт флагы күтәрелгәс, ҡотлау өсөн тәүге һүҙ Борис Николаевчҡа бирелде.

–    Хөрмәтле уҡытыусылар, уҡыусылар һәм килгән ҡунаҡтар! Туған мәктәбеңдең 100 йыллыҡ юбилейын билдәләү бик тулҡынландырғыс, әлбиттә. Сөнки мәктәп ул – бина ғына түгел, ә беҙ үҫкән, уҡыған икенсе йортобоҙ. Бөгөн бында, ҙур, татыу ғаиләләге кеүек, тыуған төйәгебеҙҙең тарихын ижад итеүселәр: хәҙерге уҡытыусылар, педагогик хеҙмәт ветерандары, сығарылыш уҡыусылары һәм район үҫешенә күп көс һалыусылар йыйылды. Мәктәп беҙгә белем генә түгел, төп тормош  дәрестәрен – дуҫлыҡ, ихтирам төшөнсәләрен, хаталарҙы таныу һәм алға барыу һәләттәрен дә бирҙе. Бында беҙ ата-бабаларыбыҙ һәм олатайҙарыбыҙ васыят иткән хеҙмәтте, үҙ-ара ярҙам итеүҙе һәм йолаларҙы баһаларға өйрәндек. Мәктәптең күп милләтле коллективына айырым рәхмәт һүҙҙәре белдерәм. Мәктәптә төрлө милләт уҡытыусылары – башҡорттар, урыҫтар, татарҙар һәм украиндар эшләне. Әммә был беҙҙе бер ҡасан да бүлмәне, киреһенсә, берләштерҙе генә. Мәктәпкә һәм районға ярҙам итеүсе ситтә йәшәүсе яҡташтарыбыҙға айырым рәхмәт әйтәм! Кесе Ватаныбыҙҙы онотмай ярҙам итеүегеҙ һәм иғтибарығыҙ өсөн рәхмәт!  – тине  Борис Николаевич һүҙен тамамлап һәм бер төркөм хеҙмәт алдынғыларына Башҡортостан Республикаһы Дәүләт Йыйылышы — Ҡоролтайҙың Рәхмәт хаттарын һәм Башҡортостан Республикаһының Мәғариф һәм фән, Мәҙәниәт министрлыҡтарының  Почет грамоталарын,  Башҡортостандың Тәбиғәттән файҙаланыу һәм экология министрлығының Рәхмәт хаттарын тапшырып үтте.

Район Советы рәйесе Геннадий Туленков та сараға йыйылыусыларҙы мәктәптең оло юбилейы менән ҡотлап, бер төркөм мәктәп коллективы хеҙмәткәрҙәренә район хакимиәтенең Почет грамоталарын тапшырҙы.

 Шулай уҡ тантаналы сарала ҡотлау һүҙҙәре менән Башҡортостан Башлығының муниципаль берәмектәр менән үҙ-ара эш итеү идаралығының баш кәңәшсеһе Иршат Бикбулатов, Башҡортостан Республикаһының Милли архивы директоры Кинйә Күскилдин, Шәйехзада Бабич исемендәге премия лауреаты, Рәсәй һәм Башҡортостан журналистар союзы ағзаһы Сәлмән Ярмуллин, Бөтә Донъя башҡорттары Ҡоролтайы рәйесе урынбаҫары, тележурналист Наил Юнысов,  Матрай ауыл биләмәһе башлығы Руслан Йәрмөхәмәтов, мәктәп директоры Әлиә Аҡҡусҡарова һәм мәктәпте бынан 55, 50, 30, 25 һәм 20 йыл элек тамамлаусы сығарылыш уҡыусылары сығыш яһаны, белем биргән остаздарын оло хөрмәт менән иҫкә алды, сикһеҙ рәхмәттәрен еткерҙе һәм туған мәктәбен оло юбилейы менән ҡотлап, иҫтәлекле бүләктәр тапшырҙы.

Артабан кешене шәхес, шәхесте бөйөк иткән белем йортон һағынып ҡайтҡан уҡыусылар мәктәп вальсында өйрөлдө, ашнаҡсылар әҙерләгән тәмле төшкө аш менән һыйланды һәм бай йөкмәткеле байрам концерты ҡараны. Сара киске сәғәттәрҙә күңелле дискотека менән тамамланды.