Яугир егеттәргә ярҙам итеү – барыбыҙҙың да изге бурысы

Беҙҙең районда ла геройҙарыбыҙға ярҙам итеү йәһәтенән ҙур эштәр башҡарыла, даими рәүештә гуманитар ярҙам оҙатылып тора. Был изге эштә хакимиәт вәкилдәре, район халҡы, ирекмәндәр, ойошма хеҙмәткәрҙәре, шулай уҡ балалар әүҙем ҡатнаша –  маскировка селтәрҙәре үрә,  гуманитар ярҙам йыйыуҙа  һәм аҡсалата ярҙам итеү буйынса үҙ өлөштәрен индерә.

Йомағужа ауылының  “Ҡыпсаҡ сәләме”  ирекмәндәре лә, башҡалар кеүек, ир-егеттәребеҙ яҙмышына битараф түгел. Яугирҙәрҙең иҫән-һау өйҙәренә ҡайтыуын теләп, маскировка селтәрҙәре үреү, ҡорот, йәшелсәләрҙән тиҙ әҙерләнә торған аштар киптереү кеүек эштәрҙең биләмәлә туҡтап торғаны ла юҡ. Ошо көндәрҙә йомағужалар сираттағы маскировкалау селтәрен үреп бөткәндәр ҙә инде.

• Егеттәребеҙгә тип үрелгән маскировкалау селтәрҙәрен гуманитар ярҙам менән, йә ялға ҡайтҡан яугирҙәребеҙ аша ебәреп торабыҙ. Әле селтәр өсөн тағы ла материалдар алынған. Йәй осоро баҡсала, йорт тирәһендә мәшәҡәттәр күп булыуыға ҡарамаҫтан, селтәр үреүгә килеүселәр һаны кәмемәй. Киреһенсә, ваҡыт табып, бер сәғәткә булһа ла килеп, батырҙарыбыҙ өсөн ҡылынған изге эштә һәр кем үҙ өлөшөн теләп индерә. Уй-доғаларыбыҙ ҡабул булып, йорт-еребеҙҙә тиҙерәк тыныслыҡ урынлашһын, егеттәребеҙ барыһы ла үҙ ғаиләләренә имен-һау әйләнеп ҡайтһындар,   – тип бүлеште урындағы ветерандар Советы рәйесе, активист Ләлә Халикова.