+24 °С
Ямғыр
Йәмғиәт
1 Октябрь 2025, 09:30
Өмә генә түгел, байрам ул!
Ағас ултыртыу – ерҙә матур эҙ ҡалдырыуға тиң, тиҙәр. Башҡортостанда дөйөм өмә һәм ағас ултыртыу буйынса "Йәшел Башҡортостан" акцияһы старт алды. Йылдағыса, республиканың бөтә район-ҡалаһында экологик өмәләр, йәшелләндереү эштәре гөрләне. Сара сиктәрендә Йылайыр ауылының Голубцов урамындағы ял паркында хеҙмәт коллективтары һәм йәмәғәтселек вәкилдәре ағас ултыртыу эшен дауам итте. Бында тупраҡ әллә ни уңдырышлынан һаналмай, шулай ҙа үҫентеләр, ауырлыҡ менән булһа ла, нығына. Ә парк майҙансығы йылдан-йыл төҙөкләнә, матурая ғына бара.
Өмә генә түгел, байрам ул!
Эш бик ырамлы барҙы. Хатта иртәнән бирле һибәләп торған ямғыр ҙа был изге ғәмәлгә ҡамасауламайым әле тигәндәй, төшкә табан туҡтаны һәм ҡояш сыҡты. Көндөң асылыуы өмәселәрҙең кәйефен тағы ла күтәреп ебәрҙе.
Өмә һуңында район хакимиәте башлығы Борис Мелкоедов акцияла ҡатнашыусыларҙың барыһына лә рәхмәт белдерҙе һәм был йүнәлештә артабан да дауам итәсәк эштәрҙә уңыштар теләне.
«Йәшел Башҡортостан» – экологик сара ғына түгел, ә тыуған еренең, тәбиғәтенең яҙмышына битараф булмағандарҙы берләштереүсе байрам да ул. Күмәк көс менән ултыртылған ағас үҫентеләре тиҙерәк ерегеп, бар тирә-яҡҡа йәм биреп ултырыр тип өмөт итәбеҙ. Ихлас күңелдән ултыртылған ағастарыбыҙ шаулап үҫһен, уларға ҡарап быуын-быуын йылайырҙар һөйөнһөн!
Евгений Гордов фотолары.
Өмә генә түгел, байрам ул!
