Ашнаҡсы бәхете – балалар рәхмәте

Суйынсы Супан  ауылы ҡыҙы мәктәпте тамамлағас артабан уҡыуын Йылайырҙағы  һөнәрселек училищеһында дауам итә. Ҡасандыр ҡулына диплом алып район үҙәгендәге белем усағында хеҙмәт юлын башлаған йәш ҡыҙ бөгөн бай тәжрибә туплаған, иңендә ҙур яуаплылыҡ алған өлкән ашнаҡсы.

Әлфиә Әнүәр ҡыҙының  ҡулы аҫтында барлығы дүрт хеҙмәткәр - ике ашнаҡсы һәм ашнаҡсы ярҙамсылары үҙ-ара дуҫ һәм бер команда булып эшләй. Иркен, яҡты  ашханала көн дә йылы аш, тәмле, файҙалы бутҡа, салат-турама әҙерләп, кескәйҙәрҙе һыйлайҙар.  Үҙ эшенә бөтә күңелдәрен биреп, яратып башҡарғанға күрә , бешергән ризыҡтары татлы, аҙыҡ-түлек  блогы таҙа һәм бөхтә.

– Үҙ һөнәреңде яратмаһаң, бер урында оҙаҡ йылдар эшләү мөмкин түгелдер. Эшеңә бар күңелеңде һалып башҡарғанда ғына эшең ырамлы, ә бешергән ашың тәмле буласаҡ. Балаларҙың бешергән аш- һыуыңды яратып ашауҙары, һуңынан «Рәхмәт», «Тәмле булды!» тигән һүҙҙәре беҙҙең эшебеҙгә иң ҙур баһа,  – ти өлкән ашнаҡсы Әлфиә Вәлиуллина.