Дуҫлыҡ һәм берҙәмлек өсөн!

Осрашыуҙа иң беренсе сиратта актуаль мәсьәләләр тикшерелде. Эске эштәр министрлығының Йылайыр районы буйынса бүлексәһе участка инспекторы Сергей Алексеев хәҙерге ваҡыттағы төрлө мутлашыусыларҙың тап ошо төркөм кешеләре менән, йәғни һалдаттарҙың туғандарының ауыр эмоциональ хәлдә булыуын һәм психологик йоғонтоға бирелеүсән ваҡытын файҙаланып, әүҙем эшләүен билдәләне. Белгес бындай осраҡта үҙеңде нисек тоторға кәрәклеге тураһында тағы бер тапҡыр аңлатма индереп үтте. Был мәғлүмәт осрашыуҙа ҡатнашыусыларҙың барыһы өсөн дә бик актуаль булып сыҡты.

Сараға килгән Күп функциялы үҙәк етәксеһе Гүзәл Солтанова, «Ватанды һаҡлаусылар» фондының социаль координаторы Регина Әбделмәнова, район ветерандар Советы рәйесе Надежда Булавина үҙ хеҙмәттәре йүнәлешенә ҡағылышлы һорауҙарға яуап бирҙе.

Артабан ғаилә хеҙмәте белгесе Рүзилә Айытҡолованың тәҡдиме буйынса яуҙа йөрөүсе егеттәребеҙгә амулеттар әҙерләү ойошторолдо. Улар мәктәп уҡыусылары яҙған хаттар менән яугирҙәребеҙгә ебәреләсәк. Шулай уҡ, ҡатын-ҡыҙҙар «Преображенск» социаль хеҙмәтләндереү үҙәгенә барҙы, унда яугирҙәр өсөн киптерелгән продукттар әҙерләү барышы менән танышты. Осрашыу йылы сәй һәм күңелле аралашыу менән тамамланды.

Евгений ГОРДОВ фотолары.