-10 °С
Болотло
Бөтә яңылыҡтар
Йәмғиәт
4 Март , 14:35
Күпбәйге үтте
Ҡыштың аҙаҡҡы көндәрендә Йомағужала Рәсәй халыҡтары берҙәмлеге йылына, республикабыҙҙа иғлан ителгән ҙур һәм татыу ғаилә йылына һәм махсус хәрби операцияла ҡатнашыусыларға ярҙам итеүгә бағышланған милли һәм этник спорт төрҙәре буйынса район күләмендә күпбәйге үтте. Сараны асыу тантанаһында район хакимиәте башлығы урынбаҫары Илшат Солтангәрәев, Ҡәнзәфәр ауыл биләмәһе башлығы Рөстәм Тотманов һәм спорт ветераны Искәндәр Аҡҡужин ҡатнашты һәм бәйгеселәргә сәмле ярыш теләне.
Күпбәйге үтте
Ярыш шарттарына ярашлы ҡатнашыусылар пневматик винтовканан һәм уҡ менән атыуҙа, һөңгөнө мәргәнлеккә ырғытыуҙа үҙ көстәрен һынап ҡараны.
Бәйге һөҙөмтәләре буйынса 18 йәшкә тиклемге егеттәр араһында 1-се урынды Ҡашҡарҙан Илһам Юлгилдин яуланы. Юлдыбайҙан Рияз Әбсәләмов һәм Йомағужанан Урал Хәсәнов 2-се, 3-сө урындарға лайыҡ булдылар.
35 йәшкә тиклемге ир-егеттәр араһында Йылайырҙан Айҙар Байсурин – беренсе баҫҡыста, Йомағужанан Ирек Аҡҡужин – икенсе һәм Сәләхтән Мөнир Теүәлбаев – өсөнсө баҫҡыстарҙа билдәләнде.
35 йәштән ололар араһында Йылайырҙан Илгиз Аҡҡужин беренсе, Юлдыбайҙан Ришат Аҡҡужин икенсе, Йылайырҙан Ғәфүр Байморатов менән Сәләхтән Йәлил Ҡотләхмәтов өсөнсө урындарҙы яуланы.
Ҡатын-ҡыҙҙар араһында Филиә Аҡҡужина (Йылайыр) 1-се урынға лайыҡ булды. Зилә Солтанова (Йылайыр) менән Илүзә Ҡоҙашева (Ҡашҡар) икенсе-өсөнсө урындарҙы бүлеште.
Вәлимә Такаева менән Сынтимер Мостафин (Ҡашҡар) спорт сараһының иң оло һәм иң йәш ҡатнашыусылары тип табылды.
Шулай уҡ ҡатын-ҡыҙҙар араһында теләүселәр скандинав йөрөшө буйынса ла ярышты. Был спорт төрөндә Филиә Аҡҡужинаға тиңдәр булманы. Лилиә Иҫәнбаева – икенсе, унан әҙ генә ҡалып, финишҡа килеп еткән Илүзә Ҡоҙашева өсөнсө урынды алды.
Сара һуңында барлыҡ ҡаташыусылар ҙа грамоталар, тейешле дәрәжә миҙалдар һәм бағыусыларҙан иҫтәлекле бүләктәр менән билдәләнде.
Новости партнеров