Шайморатов класына ҡабул иттеләр

Ошо көндәрҙә Шәйехзада Бабич исемендәге башҡорт гимназияһында һәм Мөслим Әбсәләмов исемендәге Юлдыбай урта  дөйөм белем биреү мәктәбендә район уҡыусыларын тантаналы рәүештә шайморатовсылар сафына ҡабул иттеләр.

Был сара балалар өсөн дә, ата-әсәләр өсөн дә бик яуаплы һәм тулҡынландырғыс мәл булып иҫтә ҡалды. Ә уҡытыусылар, класс етәкселәр өсөн был тик яуаплылыҡ һәм ғорурлыҡ тойғоһо ғына уята тип әйтһәк бер ҙә хата булмаҫ. 

Матур уҡыу формаһында килгән йәш шайморатовсылар был көндән башлап башҡаларға үрнәк, ғорурлыҡ һәм тырыш булырға вәғәҙә бирҙе. Бөгөнгө йәштәребеҙ һәм уҡыусы балаларыбыҙ патриотик рухта тәрбиәләнеүе барыбыҙ өсөн дә ҡыуаныс. Сөнки тарихи ваҡиғаларҙы, үҙебеҙҙең батырҙарыбыҙҙы иҫебеҙҙән сығармай быуындан-быуынға һөйләп, дөрөҫ йүнәлештә йәшәүебеҙ, күпкә яҡшыраҡ һәм фәһемлерәк булыуы күптән инде раҫланған.

Районыбыҙҙа барлыҡҡа килгән Шайморатов вариҫтарына уҡыуҙарында уңыштар  һәм дуҫ, татыу булып үҫеүҙәрен, Илебеҙгә кәрәкле кеше булыуҙарын теләп ҡалабыҙ!

Фотола Мөслим Әбсәләмов исемендәге Юлдыбай урта мәктәбе уҡыусылары.

Земфира Аҡҡусҡарова-Кинйәбаеваның "Бәйләнештә"ге төркөмөнән алынды.