“Һаулыҡ һаҡлау” милли проектының тәүге звеноны яңыртыу программаһына ярашлы, Аҡъяр үҙәк район дауаханаһына Lifotronic H9 гликирланған гемоглобин (ҡандағы уртаса глюкоза кимәлен өс айға тиклемге уртаса миҡдарын асыҡлаусы биохимик күрһәткес) анализаторы алынды.
Яңы аппаратта тикшереүҙәр үткәрелә башлаған да инде. Был анализ диабеттың төрлө формаларын диагностикалауҙа һәм дауалауҙа мөһим ҡорал булып тора. Ул һуңғы ике-өс айҙағы ҡанда булған уртаса шәкәр кимәлен билдәләй. Уның һөҙөмтәһе буйынса диабет өҙлөгөүҙәре хәүефен асыҡлайҙар.
–Тулыһынса автоматлаштырылған анализатор ни бары 96 секунд эсендә һөҙөмтә алырға, гемоглобин фракцияларын асыҡларға ярҙам итә. Хеҙмәткәрҙәр яңы ҡорамалда эшләү серҙәрен үҙләштерҙе. Элек бындай анализдарҙы яһау өсөн пациенттарҙы Сибай үҙәк ҡала дауаханаһына ебәрә инек, хәҙер барыһын да үҙебеҙ башҡарабыҙ. Анализаторҙың ҡеүәте ҙур – йылына 1200-гә тиклем тикшереү үткәреү мөмкин, – ти баш медицина шәфҡәт туташы Әлиә Мәмбәтова.
Рәсәй Президенты Владимир Путиндың “май“ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.
”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу.