Ҡариҙелдә ГТО фестивале үтте

Ҡариҙел районының Ҡариҙел ауылындағы “Олимпиясы” физкультура-һауыҡтырыу комплексында сәләмәтлек мөмкинлектәре сикләнгән кешеләр араһында ГТО фестивале үтте. “Хеҙмәткә һәм оборонаға әҙер” бөтә Рәсәй физкультура-спорт комплексы фестивале “Демография” милли проектының “Спорт - йәшәү нормаһы” федераль проекты сиктәрендә үткәрелә.

Һынауҙар барышында ҡатнашыусылар көс, сыҙамлыҡ, һығылмалылыҡ кеүек физик сифаттарын күрһәтте. Ҡариҙелдәге 1-се һәм 2-се мәктәптәрҙең 27 уҡыусыһы үҙҙәренең көсөн биш төрҙә һынаны: алға эйелеү; арҡала ятып кәүҙәне күтәреү; иҙәндә ятып ҡулдарҙы бөгөү һәм яҙыу; урындан оҙонлоҡҡа һикереү һәм теннис тубын сәпкә ырғытыу.

Фестиваль юғары эмоциональ кимәлдә үтте. Барыһы ла бер-береһе өсөн бик ныҡ тулҡынланды, ярҙам итте һәм өлгәшелгән уңыштарға ҡыуанды. Был көндө нормативтар тапшырған, шулай уҡ иптәштәре өсөн янып-көйгән һәр кем ыңғай тәьҫораттар алды. Байрамда ҡатнашыусыларға маҡтау ҡағыҙҙары һәм татлы бүләктәр тапшырылды. Артабан бөтә ҡатнашыусылар ҙа ГТО айырма билдәләрен аласаҡ, был артабанғы спорт ҡаҙаныштары өсөн өҫтәмә мотивация буласаҡ.

Билдәле булыуынса, “Демография” (национальный проект “Демография”) милли проекты Рәсәй Президенты Владимир Путиндың май указы менән булдырылды.