Маяҡтан - Мароккоға

Көйөргәҙе районының Маяҡ ауылындағы май экстрактлау заводы Мароккоға 3,2 мең тонна гранулланған көнбағышты экспортҡа ебәргән.

Был хаҡта “Россельхознадзор”ҙың Башҡортостан буйынса идаралығы матбуғат хеҙмәтенән хәбәр иттеләр. Төбәгебеҙҙең агросәнәғәт комплексы продукцияһын сит илгә ебәреү Рәсәй Президенты Владимир Путиндың тәҡдиме нигеҙендә булдырылған “Халыҡ-ара кооперация һәм экспорт” милли проектына (национальный проект “Международная кооперация и экспорт”) ярашлы тормошҡа ашырыла.

Ғөмүмән, ҡыҫҡа ваҡыт эсендә Төньяҡ Африка илдәре беҙҙең гранулланған көнбағыш ҡалдыҡтарын күпләп һатып алыусыға әйләнде. Европа союзы илдәре ауыл хужалығы малдары һәм ҡоштары өсөн юғары протеинлы аҙыҡ ҡушылмаларын һатып алыу күләмен аҙайтһа, уларҙан бушаған урындарҙы Африка континенты дәүләттәре әүҙем тулыландыра башланы.

Аҙыҡ 46 тимер юл вагонында ебәрелеп, тейешле урынға алып барып еткерелде. Йыл башынан иҫәпләгәндә, Марокко Башҡортостандан 5,5 мең тонна продукция һатып алған.