Ирекмәндәр йыйыу башланды

Рәсәйҙә 2026 йылда ипкә килтереүгә тәғәйенләнгән йәмәғәт биләмәләрен һайлау буйынса Бөтә Рәсәй тауыш биреүен үткәреүгә ирекмәндәр йыйыу башланды. Тауыш биреү йыл һайын «Тормош инфраструктураһы» милли проектының (национальный проект “Инфраструктура для жизни”) «Уңайлы ҡала мөхитен булдырыу» федераль программаһы буйынса үткәрелә, тип хәбәр итә БР Торлаҡ-коммуналь хужалыҡ министрлығы.

Йыл һайын тауыш биреүҙә илдең 1,5 меңгә яҡын муниципаль берәмеге ҡатнаша, уның барышында төбәктә төҙөкләндерелә торған объекттарҙы тап халыҡ һайлай.

Һайлау атҡарыуҙа халыҡҡа инде бишенсе тапҡыр ирекмәндәр ярҙам итә. Улар махсус мәғлүмәт пункттарында, йәмәғәт урындарында һәм күмәк сараларҙа эшләй. Ирекмәндәрҙең бурысы — граждандарға төҙөкләндереү өсөн объекттар һайлау мөмкинлеге тураһында һөйләү, проект дизайны менән таныштырыу һәм тауыш биреүҙә ҡатнашырға ярҙам итеү.

14 йәшкә еткән һәр кем ирекмән була ала. Бының өсөн Добро.рф порталында теркәлергә генә кәрәк. Ғаризалар 14 апрелгә ҡәҙәр ҡабул ителә.

Башҡортостан халҡы йәшәү мөхитен төҙөкләндереү мәсьәләләрен хәл итеү буйынса йылдан-йыл әүҙемерәк ҡатнаша. Мәҫәлән, 2023 йылда проектта дүрт меңдән ашыу ирекмән ҡатнашһа, былтыр инде – 10 мең тирәһе. Был күрһәткес буйынса республика – РФ субъекттары араһында иң алдынғыһы.

Тауыш биреү 21 апрелдән 12 июнгә тиклем za.gorodsreda.ru сайтында бара.

2021 йылда үткәрелгән тәүге сарала – 387 мең, 2022-лә – 560 меңдән ашыу, 2023-лә – 760 мең кеше тауыш биргән, ә былтыр инде был һан бер миллионға тиерлек барып еткән.