Аҡъярҙа колледж асыласаҡ

Хәйбулла районының Аҡъяр ауылында Сибай медицина колледжының филиалын асыу планлаштырыла. Шулай уҡ, ағымдағы йылда алты поликлиника төҙөлөшөн тамамларға, 9 бинаны ремонтларға, 134 тиҙ төҙөлә торған модуль конструкцияһын ҡороу һәм 99 берәмек санитар автотранспорт һатып алырға кәрәк.

- Хәйбулла районында Сибай медицина колледжы филиалын асыу бик кәрәкле эш. Һуңғы йылдарҙа йәштәр был һөнәрҙең мөһимлеген аңлай һәм ошо юҫыҡҡа ныҡлы ынтыла. Төбәк өсөн был бик ҙур аҙым, -ти үҙәк дауахананың прфком рәйесе, йәмәғәт фекере лидеры, Сибай башҡорттары ҡоролтайы ағзаһы Басир Шәрипов.

Филиал И.Тасимов исемендәге Аҡъяр тау коллеждында урынлашасаҡ. Студенттар практик белемде Аҡъяр үҙәк дауаханаһында аласаҡ. Был үҙ нәүбәтендә йәштәргә йәшәгән урындан алыҫ китмәй сифатлы медицина белем алыуға булышлыҡ итәсәк. Филиал «Шәфҡәт туташы» специальносына 9-сы класты тамамлаусы 25 кешене бюджет нигеҙендә уҡырға ҡабул итәсәк. Уҡыу йорто кабинеттары заманса техника, практика өсөн кәрәк-яраҡ менән тәьмин ителәсәк.

Сығанаҡ: https://haibh.ru/news/novosti/2025-03-21/a-yar-a-sibay-meditsina-kolledzhyny-filialyn-asyu-planlashtyryla-4167404