Аксаков әкиәте буйынса уйын булдырылған

Башҡортостанда Сергей Аксаковтың әҫәрҙәре мотивтары буйынса өҫтәл уйыны әҙерләнде, тип хәбәр итә республика Хөкүмәтенең матбуғат хеҙмәте. Уйын “Аксаков урманы“ тип атала. Уның авторы – йәш уйлап табыусы Артем Шахов. Ул яңы уйынды “Хыялдар вакыты“ уйын индустрияһы фестивалендә тәҡдим итте. Сара Өфөлә “Һөҙөмтәле һәм конкурентлы иҡтисад“ милли проектына ярашлы үтте.

– “Хыялдар вакыты“ фестивале ижади индустрияларҙы, атап әйткәндә, уйын индустрияһын үҫтереүгә, шулай уҡ йәш уйлап табыусыларға ярҙам итеүгә йүнәлтелгән. Фестиваль йөҙҙән ашыу бәләкәй һәм урта эшҡыуарлыҡ субъекттарын, үҙмәшғүлдәрҙе һәм студенттарҙы берләштерҙе. Был ошо өлкәгә ҡыҙыҡһыныу барлығын билдәләй,– тине Башҡортостандың эшҡыуарлыҡ һәм туризм министры Зөһрә Гордиенко.

Был – Артем Шахов эшләгән дүртенсе өҫтәл уйыны. Ул өҫтәл уйындары китаптар кеүек үк потенциалға эйә тип иҫәпләй һәм үҙенең проекттарын бөтә Рәсәй буйлап үҫтерергә ниәтләй.

– Өҫтәл уйындары балаларҙа ла, өлкәндәрҙә лә бик популяр, – ти “Аксаков урманы“н ойоштороусы. – Улар кешеләрҙе берләштерә һәм яҡындарығыҙ менән күңелле ваҡыт үткәрергә мөмкинлек бирә.

Билдәле булыуынса, “Һөҙөмтәле һәм конкурентлы иҡтисад“ (национальный проект “Эффективная и конкурентная экономика”) милли проекты Рәсәй Президенты Владимир Путиндың май указы менән булдырылды.