Биш меңләп вакансия тәҡдим ителә

“Рәсәйҙә эш. Мөмкинлектәр осоро” тип исемләнгән Бөтә Рәсәй эшкә урынлашыу йәрминкәһенең төбәк этабында Башҡортостандан 60-тан ашыу эш биреүсе яҡынса биш меңләп вакансия тәҡдим итәсәк. Был сара 18 апрелдә  “Кадрҙар” милли проектына ярашлы (национальный проект “Кадры”) башҡарыла, тип хәбәр итә төбәктең Ғаилә, хеҙмәт һәм халыҡты социаль яҡлау министрлығы.

– Вакансияларҙы эре предприятиелар тәҡдим итә. Улар эш хаҡы йәһәтенән дә, төрлө тармаҡ эшмәкәрлеге буйынса ла ҡыҙыҡлы булмаҡсы. Нефть һәм газ сығарыу, төҙөлөш, машиналар эшләү, аҙыҡ һәм еңел сәнәғәт, һаулыҡ һаҡлау, йәмәғәт туҡланыуы, транспорт, сауҙа һәм хеҙмәттәр, агросәнәғәт комплексы буйынса хеҙмәт урындары табырға мөмкин буласаҡ, – тине төбәктең Ғаилә, хеҙмәт һәм халыҡты социаль яҡлау министры Ленара Иванова.

Әйтергә кәрәк, “Кадрҙар” милли проекты эш биреүселәрҙең талабына ярашлы тиҙ һәм сифатлы итеп белгестәр әҙерләүгә булышлыҡ итә. Был белем биреү учреждениелары, компаниялар һәм дәүләттең берлектәге эше һөҙөмтәһендә башҡарыла. 2029 йылға мәшғүллек хеҙмәте селтәрен тулыһынса яңыртыу планлаштырыла. “Рәсәйҙә эш” кадрҙар үҙәгенең яңы нөктәләре асыласаҡ.

Милли проекттар ил Президенты Владимир Путин ҡарары буйынса тормошҡа ашырыла.