Елдереп кенә барып етербеҙ

2025 йылда “Тормош өсөн инфраструктура” милли проекты (национальный проект “Инфраструктура для жизни”) ярҙамында Башҡортостанда 2025 йылда туғыҙ туристик йүнәлеш ремонтланды, тип хәбәр иттеләр республиканың Транспорт һәм юл хужалығы министрлығынан.

Эштәр Өфө — Инйәр — Белорет, Белорет — Учалы — Мейәс, Стәрлетамаҡ — Белорет — Магнитогорск, Өфө — Иглин — Ҡыҙылъяр — Павловка, Миәшәгәр — Торналы — Мөрсәлим, Стәрлетамаҡ — Раевка, Магнитогорск — Ира, Иҫке Собханғол — Мораҡ, Ишембай – Воскресенское — Мәләүез кеүек трассаларҙа уҙғарылды. Шулай итеп, 75 километрҙан ашыу юл норматив хәлгә килтерелгән.

– Был юлдар Әбйәлил, Белорет, Ишембай, Ҡырмыҫҡалы, Учалы, Хәйбулла, Салауат һәм республиканың башҡа райондарына алып бара, унда Башҡортостандың төп тәбиғәт иҫтәлекле урындары, туристик объекттар һәм йәйге ял итеү урындары тупланған. Шуға күрә был йүнәлештәр халыҡта ғына түгел, республика ҡунаҡтарында ла популяр. Тәүлегенә ошо юлдар буйлап 1,5 меңдән 15 меңгә тиклем автомобиль үтә, — тип һөйләне Башҡортостандың транспорт һәм юл хужалығы министры Любовь Минакова.

2025 йылда “Тормош өсөн инфраструктура” милли проекты буйынса Башҡортостанда дөйөм оҙонлоғо 1260 погон метр булған 355 саҡрымдан ашыу юл һәм 11 күпер тәртипкә килтерелде. Яңыртылған милли проекттар Рәсәй Президенты Владимир Путиндың указына ярашлы 2025 йылдан тормошҡа ашырыла.