Юлдарҙың сифаты яҡшыра

Ниндәй ҙә булһа территорияның иҡтисади үҫеш кимәлен баһалағанда иң мөһим күрһәткестәрҙең береһе булып автомобиль юлдарының сифаты тора.
Беҙҙең районға килгәндә, автомобиль юлдарының оҙонлоғо буйынса барыһы ла яҡшы, ә бына уның хәл-торошо бик үк ҡәнәғәтләндерерлек түгел тип әйтергә була. Шулай ҙа, Йылайырҙан Иҫәнғолға, йә булмаһа Сибай ҡалаһына һуҙылған етмешенсе йылдарҙағы ҡырсынташ юлдар менән сағыштырғанда беҙ йөрөгән бөгөнгө асфальт юлдар күпкә яҡшыраҡ, килешәһегеҙҙер...
Әммә юлдарҙы төҙөү һәм төҙөкләндереүҙә камиллыҡҡа сиктәр юҡ, шул рәүешле унда йөрөүсе автомобилселәргә юлдарҙың тағы ла таҡырыраҡ һәм уларҙың яҡшы сифатта, хәүефһеҙ булыуы кәрәк.
Йылайыр юл төҙөү-ремонтлау идаралығы коллективы, иҡтисади һәм башҡа ауырлыҡтарға ҡарамаҫтан, районыбыҙ юлдарының (ә уларҙың оҙонлоғо беҙҙә 500 километрҙан ашыу) һәйбәт торошта булыуы өсөн мөмкин булғандың барыһын да эшләргә тырыша. Уҙған аҙнаның бер көнөндә юл төҙөү-ремонтлау идаралығы хеҙмәткәрҙәре һөнәри байрамын билдәләне. Был коллектив өсөн ағымдағы йылдың күп сәбәптәр арҡаһында ҡатмарлы булыуы билдәле. Сөнки ҡыштың айырыуса ҡарлы булыуы уларҙың эш күләмен арттырҙы ғына. Ә бына йәйге осорҙа юлдарҙы ремонтлау буйынса эш артыҡ күп булмаһа ла, иң проблемалы урындарҙа асфальт япмалары һалынды.
Шулай уҡ юл төҙөү-ремонтлау идаралығы хеҙмәткәрҙәре быйыл муниципаль заказдар үтәүгә, йәки бер нисә ауыл биләмәһе территорияһында өлөшләтә асфальт түшәп һалыуға өлгәште.
Быйылғы көҙ айҙары ҡоро тороуын файҙаланып ДРСУ эшселәре әле лә әүҙем эш алып бара (һүрәттәрҙә).
Киләсәктә был коллективҡа уңышлы һәм халыҡ өсөн файҙалы хеҙмәт миҙгелдәре теләйбеҙ!

Евгений ГОРДОВ фотолары.