Күркәм йорттар, төҙөк ҡоймалар...

Дөйөм алғанда, шуныһы күҙгә ташлана: әлбиттә, ауылды төҙөкләндереү буйынса байтаҡ эштәр башҡараһы бар әле. Кеше бейеклек үлән үҫеп ултырған ташландыҡ ихаталар ҙа юҡ түгел. Шулай ҙа, бер-бер артлы ҡалҡып сыҡҡан күркәм йорттарҙың күбәйеүе лә ҡыуандырмай ҡалмай.
Ә беләһегеҙме, иң беренсе күҙгә нимә ташлана? Юҡ, өйҙәр түгел, ҡоймалар! Ағас, тимер ҡоймалар, сағыу төҫтәргә буялған семәрле ҡапҡалар – улар артында ысын әкиәт батшалығы. Сәскә-ҡыуаҡтарҙың, емеш ағастарының ниндәйен генә үҫтермәй икән уңған хужалар. Төрлө төҫтәге раузалары, гортензия, хоста, агератум, петуния, лилиә, георгин, флоксы, ләләләрҙән һәм башҡа сәскәләрҙән күҙҙәр ҡамаша.
Хәтерегеҙгә төшөрәбеҙ, “Өлгөлө йорт”тарҙы билдәләү һәм еңеүселәрҙе бүләкләү тантанаһы Ауыл көнөнә арналған байрамда уҙасаҡ. Бәйгене ойоштороусылар билдәләүенсә, яҡын киләсәктә конкурсты район кимәленә күтәрергә иҫәп бар. Уларҙың был хыялы тиҙерәк бойомға ашһын тип теләйек. Сөнки матурлыҡ ул – бөйөк көс, айырыуса тыуған ереңдең матурлығы...