+24 °С
Ямғыр
Новости
28 Ғинуар , 08:30
«Яңы йыл ғаилә уйындары» үтте
«Яңы йыл ғаилә уйындары»ның муниципаль этабы 20 ғинуар көнө Йылайыр ауылының үҙәк майҙанында үтте. Унда мәктәп этабында еңеү яулаған командалар көс һынашты.Ярышта район мәктәптәренән туғыҙ ғаилә командалары бәйгегә сыҡты. Сарала ҡатнашыусы ғаиләләр төрлө ҡыҙыҡлы, күңелле уйындарҙа ярышты: барлыҡ ҡатнашыусылар быйма кейеп, теннис тубын сәкән менән, артабан обруч менән ваҡытҡа йөрөттөләр, команда менән обруч эсенә инеп тә, тоҡтарға балаларын ултыртып та йүгерҙеләр. Эстафетаның һәр этабында командаларҙы көйәрмәндәр хуплап, дәртләндереп торҙо.
Ҡыҙыҡлы һәм көсөргәнешле ярышта иң күп мәрәйҙәр йыйып, Ш.Бабич исемендәге башҡорт гимназияһы өсөн сығыш яһаусы Байсуриндар ғаиләһе еңеүсе тип табылды. Быйыл улар районыбыҙ намыҫын республика кимәлендә яҡлаясаҡ, уларға уңыштар теләйбеҙ. Икенсе урынға Н.Р.Ириков исемендәге урта мәктәп исеменән сығыш яһаусы Рәмовтар ғаиләһе лайыҡ булды. М.Әбсәләмов исемендәге Юлдыбай урта мәктәбе өсөн сығыш яһаусы Ҡолһариндар ғаиләһе ярыштың өсөнсө баҫҡысында билдәләнде. Сара һуңында район мәғариф бүлеге етәсеһе Алһыу Амакасова еңеүсе тип табылған командаларға иҫтәлекле бүләктәр тапшырҙы. Шулай уҡ «Яңы йыл ғаилә уйындары”нда ҡатнашҡан барлыҡ командаларға ла “Бөтә Рәсәй” сәйәси партияһының урындағы бүлексә етәксеһе Нурзилә Йәнтилина әҙерләгән дәртләндереү приздары тапшырылды.
