Бөтә яңылыҡтар
Еңеүгә - 80 йыл
2 Апрель , 14:38

Батырлыҡ, ҡаһарманлыҡ һәм дан тураһында

Йыл башында уҡ Йылайыр районы хакимиәте тарафынан 1941-1945 йылдарҙағы Бөйөк Ватан һуғышында Еңеүҙең 80 йыллығына һәм Рәсәйҙә кимәлендә Ватанды һаҡлаусылар йылын асыу уңайынан «Батырлыҡ, ҡаһарманлыҡ, дан тураһында» конкурс-фестивален уҙғарыу иғлан ителде.

Батырлыҡ, ҡаһарманлыҡ һәм дан тураһында
Батырлыҡ, ҡаһарманлыҡ һәм дан тураһында

Был конкурстың төп маҡсаты – илебеҙ геройҙары тарихын һәм уның хәрби даны тураһында иҫкә төшөрөү, шулай уҡ үҫеп килгән быуында патриотизм тәрбиәләү.
Патриотик рух һәм сәм өләшкән иҫтәлекле был сараға иң беренселәрҙән булып Яманһаҙ ауылы биләмәһе ҡушылды. Биләмәнең һәүәҫкәр артистары ҙур ғына тамаша әҙерләп Үрге Ғәле ауылы биләмәһе халҡы алдында сығыш яһаны.
Сидоровка ауылында үткән маҡсатлы концертҡа Яманһаҙ һәм Һултантимер ауылы халҡы матур ҡул эштәренән торған күргәҙмә ойошторҙо. Унда тарих төпкөлөнә алып килгән, Бөйөк Ватан һуғышы йылдарын һүрәтләгән мәлдәрҙең булыуы бик ҡыуандырҙы.
Шулай уҡ милли кәсептәребеҙгә нигеҙләнгән әллә күпме төрлө туҡыу эштәре лә күрһәтелде. Рабиға Таһированың эштәре бик үҙенсәлекле һәм ҙур иғтибарға лайыҡ ине.
Сараның мөһим өлөшө булып торған концерт программаһы берсә тулҡынландырҙы, берсә моңландырҙы. Унда ҡатнашыусы һәр һәүәҫкәр артистың сығышы күңелдәргә үтеп инде. Тамашасыларға һултантимерҙәрҙең, Розалия Бәҙретдинова ейәне менән һөйләгән шиғырҙары бигерәк тә оҡшаны. Шулай уҡ, бөтә мәҙәни саралар уртаһында ҡайнап йәшәүсе «Әхирәттәр» халыҡ фолклор ансамбле башҡарыуындағы йыр-бейеүҙәр фестивалдең сағыу өлөшөнә әйләнде. Бейеүсе ҡыҙ Зарема Таһированың, яңғыҙ башҡарыусылар Дарья Платонова, Мәрғизә Ғәлиәкбәрова, Фәрзәнә Асҡарова, Наталья Серебрякова, Камила Хәйризаманова, Суфия Альберг һәм Гөлйемеш Иҫәндәүләтоваларҙың моңло йырҙары барыһын да хайран ҡалдырҙы.
Алып барыусы ролен башҡарған Имаметдин Торсонбаев һәм Әлфиә Ҡаҙаҡҡолова бик йөкмәткеле концерт сценарийы ярҙамы менән тамашасыларҙы дәртләндереп торҙо.
Яманһаҙҙарҙың матур сығышын ҡарап Сидоровка ауылы халҡы ҡыуанды. Уларға йылы сәйҙәр эсереп, рәхмәтттәр менән оҙатып ҡалды.

Фотолар интернет селтәренән алынды. 

Батырлыҡ, ҡаһарманлыҡ һәм дан тураһында
Батырлыҡ, ҡаһарманлыҡ һәм дан тураһында
Автор:Ильфира Аккужина
Читайте нас: