Яугир яҡташтарыбыҙ исеме мәңгеләштерелде

Сараны асыу тантанаһында Йылайыр районы хакимиәте башлығы Борис Мелкоедов, уның социаль мәсьәләләр буйынса урынбаҫары Илшат Солтангәрәев, “Хәрби туғанлыҡ” ойошмаһы етәксеһе Рөстәм Ураҡов, район ветерандар Советы рәйесе Надежда Булавина, яугирҙәрҙең туғандары, ауылдаштары, мәктәп етәкселеге, уҡытыусылар һәм уҡыусылар ҡатнашты.

Сарала батырҙарҙарса һәләк булған һалдаттар тураһында яҡты иҫтәлектәр яңғыраны, бик күп йылы һүҙҙәр әйтелде, уларҙың  хәрби хеҙмәткә мөнәсәбәте, мәктәптә уҡыған йылдары, алға ҡуйылған маҡсаттарына өлгәшә белгән ныҡышмал, бер һүҙле егет булыуҙары  тураһында һөйләнелде. Мемориаль таҡтаташ асыуға арналған тантаналы митинг бер минут тынлыҡ һәм сәскәләр һалыу менән тамамланды.
Шулай уҡ был көндө Матрай урта мәктәбендә  яугирҙәр Ринат Түләбаев менән Иҙел Наҙарғолов  исеменә  «Герой партаһы»н асыу тантанаһы уҙҙы. Рәсәй һәм Башҡортостан гимндарын тыңлағандан һуң мәктәп директоры Әлиә Аҡҡусҡарова  “Берҙәм Рәсәй” партияһы ойошторған “Герой партаһы” патриотик проектына Матрай урта мәктәбе лә ҡушылыуы хаҡында һөйләп үтте. Партаны асыу хоҡуғы район хакимиәте башлығы Борис Мелкоедов менән ҡарһарман яугирҙәрҙең туғандарына бирелде.

-Был парта артында иң яҡшы уҡыусылар ғына ултырырға хоҡуҡлы. Сөнки был егеттәр беҙҙең тыныс, имен тормошобоҙ хаҡына үҙ ғүмерҙәрен ҡорбан иткән, һеҙ ҙә үҙегеҙҙең уҡыуҙағы уңыштарығыҙ менән уларға лайыҡлы алмаш булыуығыҙҙы иҫбатлағыҙ. Парталар оҙаҡ хеҙмәт итһен һәм һеҙҙе яңынан -яңы уңыштарға илһамландырһын,  – тигән теләктәрен еткерҙе Борис Николаевич мәктәп уҡыусыларына мөрәжәғәт итеп.

Батырҙарҙарыбыҙҙың фотоһүрәте ҡуйылған был партаға уларҙың ҡыҫҡаса биографияһы, Тыуған иле алдындағы батырлыҡтары тураһында мәғлүмәт яҙылған.  Уның артына тәүгеләрҙән булып ултырыу хоҡуғы уҡыу алдынғылары, активистар  Камила Ултраҡоваға, Илназ Хөсәйеновкә, Эльвина Игелекова менән Илназ Исҡужинға  бирелде.

“Герой парта”һын асыу - мәктәп тарихында яңы бит. Был проект үҫеп килеүсе быуында Ватан тарихына, илебеҙҙең үткәненә һәм бөгөнгөһөнә ихтирам тәрбиәләүҙә, Бөйөк Ватан һуғышы, тыл һәм хеҙмәт ветерандарына, хәрби хәрәкәттәрҙә һәм махсус хәрби операцияла ҡатнашыусыларға ихтирам уятыу, уларҙың исемдәрен мәңгеләштереү  маҡсатында булдырылған. “Герой парта”һы батыр егеттәребеҙ тураһында яҡты иҫтәлек булып тора, шуға күрә уның артында ултырған һәр уҡыусыла ҡаһарман яҡташына ҡарата  ғорурлыҡ ,  хөрмәт һәм ихтирам хисе тыуасағына шик юҡ.