«Яулыҡ – милләт символы”

Унда һәр ауыл биләмәһе ҡатын-ҡыҙҙарынан торған төркөм баһалама ағзалары иғтибарына әсәй-өләсәйҙәрҙән ҡалған, зиннәтле ҡомартҡы итеп һандыҡ төптәрендә һаҡланған боронғо яулыҡтарҙан һәм ҡул эштәренән торған күргәҙмә һәм “Яратҡан яулығым” фотокүргәҙмәһен  тәҡдим итте. Ябай яулыҡ, шәл, француз яулыҡ, бохара яулыҡтары, ҡушъяулыҡ, кейеҙ яулыҡ, таҫтар, һуғылған яулыҡ һәм башҡа төр яулыҡ, шәлдәр байрам биҙәге булды һәм сараға килеүселәрҙә ҙур ҡыҙыҡһыныу уятты. Күргәҙмәлә ҡатнашыусылар үҙ яулығының тарихын һөйләне, уларҙың ниндәй туҡыманан яһалыуҙары хаҡында мәғлүмәт бирҙе.

- Әсәйемдән ҡалған был яулыҡҡа инде 80 йылдан артыҡ ваҡыт үтһә лә күҙ ҡараһылай һаҡлап тотам. 1941 йылда әсәйемдең атаһы, Вәлиулла ҡартатайым, Бөйөк Ватан һуғышына китер алдынан бер йәшлек кенә ҡыҙына-әсәйемә, ошо яулыҡты бүләк итеп “Ҡыҙым, мин ҡайтырмын, көтөгөҙ! – тип яуырынына япҡан, тип хәтирәләре менән бүлеште “Тәңкәбикә” ағинәйҙәр ойошмаһы ағзаһы Миңзәлә Атанғолова, үҙенең ҡомартҡы яулығы хаҡында.

Фестивалдең икенсе өлөшөндә Юлдыбай ауылынан килеүсе Мәғәзирә Иҫәндәүләтова баш кейеме –таҫтар сигеү биҙәктәре, Йылайырҙан Элзирә Батисова мосолманса яулыҡ бәйләү, Яманһаҙҙан килгән Наталья Ивлева яулыҡтарҙы көнкүрештә заманса бәйләү буйынса оҫталыҡ дәресе күрһәтте. 

Баһалама ағзалары бар эштәр менән ентекле танышҡандан һуң ҡатнашыусыларҙы төрлө номинацияларҙа баһаланы. Шулай итеп «Милли яулыҡ” номинацияһында 1- се урын Матрайҙарға (етәксеһе Мөнирә Атанбаева ), 2-се  урын Йомағужаларға (етәксеһе Лилиә Иҫәнбаева) һәм 3-сө урын Ҡашҡарҙарға (етәксеһе Яңылбикә Яманғолова) эләкте.  “Ғаилә ҡомартҡылары” номинацияһында 1-се  урын  Йылайырҙан “Тәңкәбикә” ағинәйҙәр ойошмаһына (етәксеһе Фәндиҙә Ҡоҙашева), 2-се урын Яманһаҙҙарға  (етәксеһе Гүзәл Моталлапова), 3-сө урын Юлдыбайҙарға (етәксеһе Мәғәзирә Иҫәндәүләтова) бирелде. “Селтәрле биҙәк” номинацияһында  Йылайырҙан Елена Горшенина 1-се урында,  Байғужалар 2-се урында (етәксеһе Раушания Яҡшыбаева),  Ҡашҡарҙар  3-сө урында билдәләнде. “Креатив яулыҡ” номинацияһында 1-се урын Йылайырҙан Надежда Булавинаға,  2-се,  3-сө урындар Яманһаҙ менән Ҡашҡарҙарға тәтене. “Тарихлы яулыҡ” номинацияһында 1-се урын Юлдыбай, 2-се урын Байғужа, 3-сө урын Матрай һәм “Яулығым –биҙәгем” номинацияһында тәүге урын Матрайҙарға, 2-се урын Һабырҙарға һәм 3-сө урын Йомағужаларға  бирелде.

Сара фестивалдә ҡатнашыусыларҙың йыр-бейеүҙәре, таҡмаҡтары менән үрелеп барҙы.  

«Бөгөн ыңғай хис-тойғолар, бик күп файҙалы мәғлүмәттәр алдыҡ, беҙгә яулыҡ ябынып та модалы күренергә мөмкин икәнлеге хаҡында һөйләнеләр һәм күрһәттеләр.  Ябай ғына күренгән яулыҡтан ҙур байрам сараһы килеп сыҡты», — тип үҙҙәренең тәьҫораттары менән уртаҡлаштылар фестиваль ҡунаҡтары. Ә байрамға йыйылған апайҙар ошо яулыҡтарҙы ҡыҙҙары, ейәнсәрҙәре лә ҡомартҡы итеп һаҡлар тигән ышаныста таралышты.  Сөнки яулыҡ – ул баш кейеме генә түгел, ҡатын-ҡыҙҙарҙың иманлылығын, тәрбиләлеген билдәләүсе, һаҡлаусы ҡалҡан да булып тора.