Бөтә яңылыҡтар
Йәмғиәт
27 Август 2019, 13:29

Йәшлекте оҙайтыусы йәшелсә асыҡланған

Ғалимдар белдереүенсә, ҡабаҡта кеше организмын йәшәртеүсе һәм һейҙек-енес системаһын дауалаусы бик күп файҙалы микроэлементтар бар. Был йәшелсәнең составына В төркөмөнә ҡараған витаминдар инә. Ә улар нервы системаһының эшмәкәрлегенә ыңғай йоғонто яһай, арыуҙан, йоҡоһоҙлоҡтан ярҙам итә, хәтерҙе нығыта.

Шулай уҡ ҡабаҡта эсәктәр эшмәкәрлеген көйләүсе матдәләр бар. Эс ҡатҡан да ҡабаҡ – иң яҡшы сара икән. Бынан тыш, ул йыуан эсәктәге елһенеүҙе бөтөрә. Бөйөрө ауыртҡандарға көн һайын ҡабаҡ һуты эсергә кәңәш ителә.

Йәшелсәнең составына ингән А һәм Е витаминдары йыйырсыҡтарҙы бөтөрә, сәсте һәм тырнаҡтарҙы нығыта.

Ҡабаҡ орлоғо токсикоз менән интегеүсе буласаҡ әсәләргә лә файҙалы. Ярты стакан орлоҡ күңел болғаныуынан ҡотолдорор.

Зөбәржәт Һиҙиәтова.