Йәш ғалимдың асышы

Кушнаренко районынан йәш ғалим Раушан Әминев ауыл хужалығын үҫтереүгә йүнәлтелгән эше өсөн бер миллион һумлыҡ грантҡа эйә булды. Ул яңы төрҙәге Strip-Till культиваторы һәм тупраҡты һыҙатлап эшкәртеү технологияһы уйлап тапҡан. Минераль ашламаларҙы бындай ысул менән индереү уңышты 20-25 процентҡа арттырып, продукцияның үҙҡиммәтен, йәғни сығымдарҙы 35-40 процентҡа кәметәсәк, ти йәш ғалим.

Яңы ҡорамал ярҙамында гранулланған йәки шыйыҡ төрҙәге ашламаларҙы ҡатламлап индерергә мөмкин. Был осраҡта ерҙең 15-25 см киңлектәге тар һыҙаты ғына эшкәртелә. Культиваторҙың яңы техник мөмкинлектәре ашламаларҙың тупраҡҡа тәьҫирен кәметәсәк, шулай уҡ яғыулыҡ-майлау материалдарын, ашламаның үҙен дә һаҡсыл ҡулланырға булышлыҡ итәсәк, ти Раушан Әминев.

Бындай культиваторҙарҙың сит илдә сығарылғаны биш миллион һум самаһы тора, ә Башҡортостан уйлап табыусыһыныҡын эшләү яҡынса 500 мең һумға төшәсәк. Уның тәүге өлгөһө Кушнаренко баҫыуҙарында һынауҙы уңышлы үткән.

Йәш ғалим үҙ асышын патент менән раҫлаған. Әлеге моделды етештереү менән Дүртөйлө ремонт-техника предприятиеһы һәм Силәбе компрессор заводы ҡыҙыҡһынған.

– Әлеге грантты фәнни асышымды артабан да үҫтереү, кәрәкле материалдар һатып алыу, яңы тәжрибәләр үткәреү өсөн тотонасаҡмын, – ти ғалим.