Уйындан уймаҡ сыға яҙған

3 июлдә, уйынсыҡ машинаһына бармағын ҡыҫтырған малайға ҡотҡарыу хеҙмәтен сыҡартҡандар. Был хаҡта республиканың Ғәҙәттән тыш хәлдәр буйынса дәүләт комитетының матбуғат хеҙмәте хәбәр итә.
Тәүҙә малайҙың әсәһе ҡыҫылған бармаҡты үҙаллы сығарып ҡарай, әммә был эш уңышһыҙ тамамлана. Һөҙөмтәлә ҡотҡарыусылар саҡырырға тура килә.
Ҡотҡарыусылар бәләкәсте һәр төрлө һорауҙар менән әүрәтеп, эшкә тотона һәм слесарь ҡорамалы ярҙамында ҡыҫылған бармаҡты бәләнән ҡотҡара.
Бәхеткә күрә, барыһы ла яҡшы тамамлана, малайға медицина ярҙамы талап ителмәй.

Фото: БР Ғәҙәттән тыш хәлдәр буйынса дәүләт комитеты.