Йылайырға кил, ҡаҙаяҡ турамаһынан ауыҙ ит!

Ә бына япондар ҡаҙаяҡты иң тәм­ле, файҙалы ашамлыҡтар исем­леге­нә индергән, хатта деликатес тип һа­най икән. Шуға күрә уны сит илдәр­ҙән, Рәсәйҙән дә күпләп һатып алалар. Шулай ҙа, ҡаҙаяҡтан ауыҙ итәм тип әллә ҡайҙағы сит илгә барырға кәрәкмәй, уны үҙебеҙҙә лә йыялар!
 Йылайырҙа ҡаҙаяҡ йыйыу бе­рен­се тапҡыр 1988 йылда, район­дың әҙер­ләүҙәр контораһын Ва­си­лий Ростов етәкләгән осорҙа, башлана. Йыйып тоҙ­ланған үҫем­лектең тәүге партия­һын Японияға оҙаталар. Киләһе йылында Василий Петровичты Мәскәүгә япондар менән осрашыуға саҡыра­лар. Көн­сығыш иле эшҡыуарҙары Баш­ҡорт­ос­тандан ҡаҙаяҡ һатып алыр­ға әҙерлеген белдерә.
30 йылға  яҡын ваҡыт үтеүгә ҡара­маҫтан, “Йылайыр” ҡул­ла­ныу­сылар йәмғиәте һаман да республикала ҡа­ҙаяҡ әҙерләгән бер­ҙән-бер ойошма булап ҡала икән.
Маринадланған ҡаҙаяҡ райондың бренды булып һанала. Иртә яҙҙан уҡ “Йылайыр” ҡулланыусылар йәмғиәте хеҙмәткәрҙәре йәш ҡаҙаяҡ һабағы йыя башлай.

Быйыл ҡаҙаяҡ һабағын йыйыуҙы ғәҙәттәгенән оҙағыраҡ көтөргә тура килде – быға һауа торошо ҡамасауланы: һыуыҡтар арҡаһында әлегә бер центнер самаһы йәшел сеймал йыйып алынған.

- Ҡар иреп бөтөү менән 4-5 көн эсендә оҙонлоғо 15 сантиметрҙан артмаған йәш ҡаҙаяҡ һабағын максималь күләмдә йыйырға өлгөрөргә тырышабыҙ, – тип һөйләй ҡулланыусылар кооперативы етәксеһе Геннадий Васильевич Туленков. – Үләнде йыйып, тарттырып бәйләп, шунда уҡ тоҙ һалынған мискәләргә һалабыҙ. Ҡаҙаяҡ тулыһынса әҙер булһын өсөн һыуын бер нисә ҡат алмаштырырға кәрәк буласаҡ. Бына шунан һуң ғына беҙҙең оҫта хужабикәләр деликатес һаналған тәмле ашамлыҡты әҙерләй.

Үҙенсәлекле визит карточкаһына әйләнгән үҫемлек халыҡ-ара күргәҙмәләрҙә юғары наградалар яулай, ул беҙҙең районға килгән туристар араһында ҙур популярлыҡ менән файҙалана. 

Үҫемлектең тамыры, һабағы фай­ҙалы матдәләргә, витамин­дар­ға бай. Ул аҡһым составы, сифаты буйынса иген куль­ту­раларына тартым, кеше организмы тарафынан еңел үҙләш­терелә, үҫеш процесы­на йоғонто яһай, матдәләр әйлә­нешен һәм нер­вы, эндокрин системаларын көй­ләй. Шуға күрә лә ҡаҙаяҡты Япония, Ко­рея, Рә­сәйҙең Алыҫ Көнсығыш төбәге халҡы яратып ҡуллана.
“Йылайыр” кафеһында ҡыҙ­ҙы­рыл­ған ҡаҙаяҡ икенсе блюдоға өҫтәмә гарнир булараҡ бирелә. Урындағы халыҡ һәм ҡунаҡтар уны яратып ашай. Ойошма ҡаҙаяҡты үҙебеҙҙең республика, күрше Орск, Ырымбур ҡалалары шифахана-курорттарына, ресторан бизнесы вәкилдәренә һата.