Балалар һәм үҫмерҙәр спортын үҫтереү мәсьәләләре ҡаралды

Сараның модераторы булып сығыш яһаған Федераль маҡсатлы үҫеш үҙәгенең спорт әҙерлеген методик яҡтан тәьмин итеү үҙәге етәксеһе Игорь Чен-Юн-тай был мәсьәләне комплекслы хәл итеү кәрәклеген билдәләне. Рәсәй Спорт министрлығының Юғары ҡаҙаныштар спорты департаменты директоры Алексей Дроздов илдә спорт резервын әҙерләү системаһы тураһында һөйләне. Ул Рәсәй төбәктәренә был өлкәләге оло эште башҡарғандары өсөн рәхмәт белдерҙе.

- Бөгөн беҙ бөтә яҡтан да спорт резервын әҙерләү системаһын ҡарарға тейешбеҙ, - тип билдәләне Алексей Дроздов.

Атап әйткәндә, спорт резервын әҙерләү системаһы эшен контролдә тотоу буйынса инструмент булдырыу, яңы һөҙөмтәле методикалар һәм һанлы технологиялар әҙерләү һәм индереү, спорт объекттарында матди-техник базаны яҡшыртыу һәм башҡа алымдар хаҡында һүҙ барҙы. Мәғариф системаһында спорт әҙерлеге системаһы тураһында Рәсәй Мәғариф министрлығының Физик тәрбиәне ойоштороу-методик тәьмин итеү федераль үҙәге директоры вазифаһын башҡарыусы Андрей Фатеев һөйләне.

- Рәсәй Федерацияһының Мәғариф министрлығы балалар-үҫмерҙәр спортын үҫтереүгә айырыуса ҙур иғтибар бирә, - тип билдәләне Андрей Фатеев. - Ведомство балаларҙың физик үҫешенә һәм сәләмәтлеген нығытыуға йүнәлтелгән даими дәрестәр ойоштороуҙы тәьмин итә.